Heydər Əliyev adına Azərbaycan Ali Hərbi Məktəbi

1918-ci ilin mart ayının 1-də Müsəlman korpusunun tərkibində açılan Milli Hərbiyyə Məktəbi Gəncədə yerləşdirildi. 1918-ci ilin oktyabr ayının 27-də Milli Hərbiyyə Məktəbinin Gəncədə ilk buraxılışı həyata keçirildi. Azərbaycan Xalq Cümhuriyyətinin hərbi nazirinin 1 dekabr 1918-ci il tarixli əmri ilə Gəncədə yerləşən Milli Hərbiyyə Məktəbi Gəncə Praporşiklər Məktəbi adlandırıldı. 1919-cu ilin sentyabr ayının 6-da Praporşiklər məktəbi Bakı şəhərinə köçürüldü və burada yerləşən əsgər xəstəxanasının binasına yerləşdirildi.1919-cu ilin oktyabr ayının 31-də Hərbi nazir Səməd bəy Mehmandarovun əmri ilə Praporşiklər məktəbi Hərbiyyə məktəbinə çevrildi. 
1920-ci ilin may ayının 25-də sovet hakimiyyəti dövründə Hərbiyyə Məktəbinin bazasında Azərbaycan Birləşmiş Hərbiyyə Məktəbi yaradıldı. 
1922-ci ilin sonlarında Birləşmiş Hərbiyyə Məktəbi 15 nömrəli binaya köçürüldü.
1923-cü ilin avqustunda məktəb Azərbaycan Birləşmiş Hərbi Məktəbi adlandırıldı. 
1927-ci ilin sentyabr ayının sonlarında Azərbaycan Birləşmiş Hərbi Məktəbinin bağlandığı elan edildi. Məktəbdə təhsil alan kursantların və müəllimlərin bir hissəsi Tiflisdə yerləşən Zaqafqaziya Piyada Məktəbinə göndərildi, onun tədris bazası isə yerləşdiyi binada (indiki 132 nömrəli məktəbin binasında) qaldı.
1928-ci ildə Bakıda fəaliyyət göstərən Zaqafqaziya Hərbi Hazırlıq Məktəbi həmin binaya köçürüldü və bu məktəb Birləşmiş Hərbi Məktəbin bazasında öz fəaliyyətini davam etdirdi.
1930-cu ilin noyabr ayında Zaqafqaziya Hərbi Hazırlıq Məktəbi yenidən qurularaq Fəhlə-Kəndli Qırmızı Ordunun komandir heyətinin S.Orconikidze adına Bakı Piyada Məktəbi adlandırıldı.1933-cü ildə Bakı Piyada Məktəbi Salyan kazarmaları şəhərciyində xüsusi olaraq bu məqsədlə tikilmiş binalara köçürüldü.1937-ci ildə Bakı Piyada məktəbi yenidən qurularaq S.Orconikidze adına Bakı Piyada Məktəbi adlandırıldı.1942-ci ilin avqustunda Qafqaz istiqamətində hərbi şərait mürəkkəbləşəndə Bakı Piyada Məktəbinin şəxsi heyətinin bazasında 164-cü atıcı briqada yaradılaraq cəbhəyə göndərildi. Məktəbdə tədris prosesi iki ay dayandırıldı.1942-ci ilin oktyabrında Qroznı Piyada Məktəbinin kursantlarının az bir hissəsi Bakıya gətirilərək iki ay müddətində burada təhsil alıblar.İki dəfə Sovet İttifaqı Qəhramanı general-mayor Həzi Aslanov, Sovet İttifaqı Qəhramanı polkovnik Aslan Vəzirov, general-mayor Akim Abbasov, Sovet İttifaqı Qəhrəmanı Ziya Bünyadov onlarca digər hərbçilər Bakı Piyada Məktəbinin məzunlarıdır.
1958-ci ildə Bakı Piyada Məktəbi Bakı Ali Ümumqoşun Komandanlıq Məktəbinə çevrildivə bu statusda öz fəaliyyətini SSRİ dövründə davam etdirdi.Azərbaycanın müstəqilliyi illərində bu məktəbin adı dəyişdirilməklə 1992-ci ilin aprelində Bakı Ali Birləşmiş Komandanlıq Məktəbi, 2001-ci ildə isə Azərbaycan Ali Hərbi Məktəbi adlandırılıb.
10 mart 2004-cü ildə Azərbaycanın Respublikası Prezidentinin Fərmanı ilə məktəbə Azərbaycan xalqının ümummilli lideri Heydər Əliyevin adı verildi.
Azərbaycan Respublikası Prezidentinin 24 dekabr 2015-ci il tarixli Sərəncamı ilə Azərbaycan Ali Hərbi Təyyarəçilik Məktəbi və Azərbaycan Ali Hərbi Dənizçilik Məktəbi quru qoşunları, hərbi hava qüvvələri, hava hücumundan müdafiə və hərbi dəniz qüvvələri fakültələri yaradılmaqla Heydər Əliyev adına Azərbaycan Ali Hərbi Məktəbinə qoşuldu.
Hazırda Heydər Əliyev adına Azərbaycan Ali Hərbi Məktəbinin 4 fakültəsinin 21 kafedrasında 23 hərbi ixtisas üzrə zabitlər hazırlanır.Məktəbin məzunlarına təhsil aldıqları ixtisaslara uyğun «bakalavr» diplomu və «leytenant» hərbi rütbəsi verilir.